كتب /محمد احمد حسن قناوى
اوقف وزير الداخليه اللواء محمد ابراهيم شاعر الشرطه ملازم اول سامح عبد الظاهر عن العمل بسب قصيده سيادة معالى المعالى الكبير بدعوى أنها تهاجم القيادات بالوزارة، وتتحدث عن سوء أحوال الضباط والأفراد في جهاز الشرطة فيما طالب بعض من زملاء الملازم بتدخل رئيس الجمهوريه لعودة الضابط الى العمل ……..
سيادة معالى المعالى الكبير
أبو بدلة ميري أو بدلة ملكي
ورتبك كتير
اسمحلي بدقائق على قد القصيدة
ابياتها عبيدة النظام الكبيرة
من وقتك الثمين اسمحلي بكلمتين
يالى من عرقنا كرشك تخين
يالى من دمائنا رسمت المهانة
على ملامح وشوشنا وخنت الضمير
نعلمكم يافندم
ضباطك بخير
امنائك بخير
افرادك بخير
باعتين التحية ومافيش عربية توصل التحية
هتتأخر شوية ناويين نبعتها بضهور الحمير
سيادة معالى المعالي الكبير
قيادتنا العظام , الفخام , الكرام , اعمدة النظام , أعمدة الرخام وبعد السلام
نعلمكم يافندم عملنا جميل
رسالتنا من رسائل النبي الجليل
قيادتي أخويا
وهو الى فاضلي
يزعق , يشخط , يحقق , ينطر , مهما حصلي أخونا الكبير
يسألني في يوم إتأخرت لية ؟
قولي يابية ؟
أقولة ظرووف معايا فى البيت
يزعق في المكتب . اعملة تحقيق
وقلب عم عبدة وابوة جوز حريق
يقوم يجازيني يومين ويراضيني
أنا يابنى ,,,,,, خايف عليك
افرض عربية هرست رجليك
اقولة تمام يافندم ياأبويا يالى خايف عليا أكتر من أبويا
مع انة شيطان وداهن وشة بويا
نسكت علشان المركب تسير
سيادة معالى المعالي الكبير
وقتى براحنا في راحتنا فظيع
كتب الوزارة حافظينها صم
عاملينها صم
وحبك مسيطر علينا يافندم
تقول الربيع
معاملة الأفراد معاملة نجوم
معاملة المتهمين معاملة نجوم
أما الضابط . فعبد مطيع
استراحتنا يافندم ……
استراحتنا يافندم ……
سبحان العظيم
كلة يافندم دة شيئ فخيم
مخلع ويوجع وعلى باب حمامنا مكتوب لينا ندفع
بدفع يافندم وياريت ما دفعت
احساس الحمام أكيد دة وصلك , مالهوش يافندم غير المناخير
سيادة معالى المعالي الكبير
راتبنا كبير كمان وبزيادة . حافز تميز , وحافز إجادة
بفكر أشترى عربية من الاجادة وفيلا في شرم من حافز الوزير
وبالفكة أغير تلاتين بيادة
وبالراتب أغير الكون الحقير
سيادة معالى المعالي الكبير
رجالتك يافندم في المظاهرة تخض
سب وشتم وأجي أرد
لابد ضبط نفس
شتمني باأبوي
لابد ضبط نفس
شتمني بأمي
لابد ضبط نفس
إشتم ياعم بموت في الشتيمة
وإلعن باقي العيلة الكريمة
رجالتك يافندم في سينا تسد
رغم الضرب المواتي علية اتعامل يابية
معاهم يافندم سلاح وحديث والى معانا دة شىء رخيص
اتعامل يابية
سلاحنا يافندم كمان بيمنع
طب فيها اية ..؟؟!!
اتعامل يابية
بيمنع يافندم بقولك يمنع
فيها اية .؟؟!!
اتعامل يابية
ومات ضابط وفرد وأمين
واصابتنا ياعم بالعشرين
وقائد المأمورية فى شريط اعلامي
هنواصل الجهود , وهنفذ الوعود
حسب تعليمات معالى الوزير
سيادة معالى المعالي الكبير
لأم الشهيد . حافز شهيد
مقابلة وعمرة وشكر شديد
ومات المسيري ومات أبو شقرة
وكمان حسنين وياسر حسني وشادي أبو رحمة
طيب اية الجديد ؟!
علشان معالى المعالى على كل شاشة يقولها بفخر .
علشانك يامصر
وأنا عايش مجرد اسم متشخبط على الهامش
وأنا ميت مع الأموات أقوم فارش
ياسيادة المعالي ومش بتحس
وبتاجر على دمي
وبتاخد تبس
وساكن في أبهى قصور
وبيني وبينك
ألفين سور
شايل منك لحد ما أموت
وبتحسبن بعلو الصوت
يا قااادر وليك قادر فوق قدر
ولو تجازيني بالعشرة أقول حاضر
ساعة الظلم بتعدي
وساعة حسابك دة الوف
لو ظلمت ما هتعدي
لكنك بردك لينا كسوف
يارب اشوف كل نمرود بيتنمرد على الجتة
واتجرد من الرحمة وسط كدااااااابين زفة
وخاد من هيبتي كام كفة
وزاد هيبتة على الجزمة
أشوفة يارب في نار وسعير
ساعة الحشر يقوم مسخور
ينادى الله
أنا ياعبدي خلقتك من شىء حقير
فتجبرت وتكبرت على عبادي
وحسابك عندي عسير
أنا في كوني ياعبدي مافيش غيري
رب كبير
أنا الجبار
أنا القهار
وساعتها يازنار تطلب رحمتة مزلول
ومهما تطول من الدنيا مني كتير
منا فى أخري وفي اخرك وفي الاخرة لينا كبير
لينا كبير