جريدة السوهاجية

جريدة السوهاجية | صوت من لا صوت له

د احمد حمدى يكتب للسوهاجيه يا ترى اتعلمنا الدرس ولا لسه

خلاص من بكرة الدنيا هتفتح والحظر هيتشال بس يا ترى اتعلمنا الدرس ولا لسه
بقلم د / احمد حمدى
احنا فجأة ومن غير مقدمات
نمنا في عالم …
وصحينا في عالم تاني مختلف
 
فجأة
أوروبا مابقتش حلم الهجرة .
امريكا اكتشفنا انها مش أقوى دولة .
وان سور الصين العظيم مش حصن .
ومكة والمدينة… فقدوا المصلين
وبقت كل المساجد فاضية
وكمان الكنايس
الكل بقى عنده هلع من الموت
الكل عرف حجمه الحقيقي
والانسان مابقالوش قيمة على وجه الارض
 
وفجاة . أصبح السلام و الاحضان والقبلات أسلحة نخاف منها ..
وبقى عدم زيارة الآباء والأهل والأصدقاء.. دليل محبة .
و أصبح همنا الاكبر أننا نحصل على الأوكسجين واننا نضمن وجوده اذا اصابنا الفيروس
 
توقفت كل مرافق الحياة فلا مطارات ولا مدارس ولا جامعات ولا مطاعم ولا كافيهاات
ولا دور دعارة ولا خمارات ولا نوادي قمار وده اجمل ما في الموضوع
وبقى العالم اكتر طهارة وأجمل وأنقى من غيرنا .
 
وبصرف النظر هل هو فيروس طبيعي ولا صنعه البشر الا اني أعتقد أنها رسالة من السما بتقول لنا :
“ الأرض والمياه والسما والهوا من غيركم بخير.. والعالم مستمر حتى لو انتو مش موجودين .. وان القبور اللي ف كل العالم مليانة بناس كانو فاكرين الدنيا مش هتمشي من غيرهم .
 
فبلاش تشيلو هم بكرة وتخططو وتتآمرو وتظلمو ويعميكم الطمع وتكنزو ف الملايين وتنسو إن الدنيا اتقلبت في لحظة.
 
وعموماً لما ترجعو لحياتكم اوعو تنسوا ابدا أنكو ضيوف
انتو مش سادة الارض ولا حاجة ..
انتو مجرد ضيوف.
 
اللهم ارحمنا برحمتك يارب.

جميع الحقوق محفوظة 2020 جريدة السوهاجية - جريدة السوهاجية | صوت من لا صوت له
المقالات والتعليقات المنشوره لا تعبر عن رأي جريدة السوهاجية ولكن تعبر عن رأي صاحبها